Ай чыкты тоодон суйкайып,
Олтурам көлдө жүз чайып.
Сүрөтүң көлдөн көрүнөт,
Сүзгөнсүп аппак жел кайык.

Кайырма:
Бешенем, бой эргип,
Бетимди жуусам бой сергип.
Уучума урунуп,
Удургуйт толкун кол берип.

Берчүдөй энчи бүгүн мен,
Бетине көлдүн үңүлөм.
Эх, жыргал экен көл жээги,
Ыр сурап берчи түбүнөн.

Кайырма:

Агарып күмүш табактай,
Асманда сызып барат ай.
Эх, жыргал экен көл жээги,
Турсачы бир аз таң атпай.

Кайырма:

Ааламга жөлөндүмбү?
Обого бөлөндүмбү?
Кыялым атырылды,
Түбөлүк жолунда.

Изимди калтыра албай,
Өзөккө айттыра албай.
Тымызын жөнөп кеттим,
Түбөлүк жолунда.

Сапарым уланууда,
Сезимим буралууда.
Жеткирбей капарыма,
Түбөлүк жолунда.

Ырайым этти бекен?
Алыска оюм кеткен.
Жылдыздын арасынан
Түбөлүк жолунда.

Узабай кайрылдымбы?
Жете албай кайрылдымбы?
Кайрылуу бар экен го,
Түбөлүк жолунда

Карайсыңбы, карабайсыңбы?
Самайсыңбы, самабайсыңбы?
Жарык нурун катып булутка,
Жашырына калган айсыңбы?

Кайырма:
Бакытымдын байрагы болуп,
Баягыдай сен жайдары жолук.
Махабаттын майрамы болуп,
Мага жолук, дагы бир жолук.

Каалайсыңбы, каалабайсыңбы?
Баалайсыңбы, баалабайсыңбы?
Оюнчуктан кызыгы тарап,
Ойго баткан баладайсыңбы?

Кайырма.

Моокумумду кандырбайсыңбы?
Ал мончоктой албырбайсыңбы?
Түбөлүккө дегдетип мени,
Төгүп өткөн жамгырдайсыңбы?

Кайырма.

Жагалмайдай кайкып учуп бара албай,
Жаш жүрөккө жагар дары таба албай.
Ак кептерим, түтөбөйүн арманга,
Кучак жайып, кумар жазып кала албай.

"Күйсөң күй" деп кашты серпип күлгөнүң,
Жанымды өрттөп, жал-жал карап жүргөнүң.
Мынча эмне түлкү куумай ойноттуң,
Айтчы деги анык беле сүйгөнүң?

Эми качан сыр түйүнүн чечесиң,
Кайсы күнү колдон кармап кетесиң.
Көрүшпөштөй келбес сапар тартсаңда,
Кантип деги кадырлашпай кетесиң.