Архив
944   945   946   947   948   949   950   951   952   953   954   955   956   957   958   959   960   961   962   963   964   965   966   967   968   969   970   971   972   973   974   975   976   977   978   979  
897   898   899   900   901   902   903   904   905   906   907   908   909   910   911   912   913   914   915   916   917   918   919   920   921   922   923   924   925   926   927   928   929   930   931   932   933   934   935   936   937   938   939   940   941   942   943  
844   845   846   847   848   849   850   851   852   853   854   855   856   857   858   859   860   861   862   863   864   865   866   867   868   869   870   871   872   873   874   875   876   877   878   879   880   881   882   883   884   885   886   887   888   889   890   891   892   893   894   895   896  
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836   837   838   839   840   841   842   843  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар

Ажар Назарова, Жамал Сейдакматованын кызы: "АПАМ “ӨЗҮҢДҮ САКТА ДЕП АЙТЫП КӨЗ ЖУМДУ”

№972 22-28-июль, 2021-ж.


“Туяк” рубрикабызда залкар адамдардын артында калган балдары менен маектешип, алардын кандай ата-эне, кандай жубай, ички дүйнөсү кандай болгонун баяндап берүүдөбүз. Атактуу актриса, театр жылдызы, Кыргыз Республикасынын Эл артисти Жамал Сейдакматованын кызы Ажар Назарова менен апасы тууралуу маектештик. “Апамдын көзү өткөнүнө жарым жыл болсо да эми өзүбүзгө келип жатабыз” дейт актрисанын кызы.

– Ажар, саламатсызбы? Жамал апаны жоготконубузга жарым жыл болуптур, оңой болбосо керек?

– Саламатсыздар, ооба, оңой болгон жок. Эми өзүбүзгө келип, апамсыз жашаш керек экенине араң макул болуп калган учурубуз. Эл залкар адамынан айрылса, биз апабыздан айрылдык. Биз эки бир тууганбыз, агам Мурат жана мен. Мага апам өзүнүн апасынын ысымын ыйгарыптыр, апасындай адам болсун десе керек. Таенем өтө назик, сөз көтөрө албаган, бирок темирдин өзөгүндөй күчтүү адам болгон экен. Мен канчалык окшошмун билбейм, бирок таенеме окшошсуң деп айтышат.

– Жамал апа кандай эне болгон? Театр, актрисалык көбүрөөк убактысын алса керек?

– Кеп апамдын жакшы же жаман эне болгонунда эмес го, кеп анын өзгөчө адам болгонунда. Өзгөчө эненин тарбиясын алдым. Апам мага майда нерселерди эмес, жашоонун негизги баалуулуктарын баалоого үйрөттү. “Сен муну жасап кой, тигини жасабай коюпсуң, кыз мындай болуш керек, антпе-минтпе” деген чектөөлөрдү койгон жок. Жашоону сүйгөндү, адамгерчиликти баалаганды үйрөттү. Мен өзүм да энемин, бирок жаш кезимде эне болгон үчүн мен энеликти анчалык түшүнбөгөн экенмин. Күнүмдүк тиричиликке, тартипке, майда-чүйдө нерсеге көп көңүл бурчу экенмин. Апам каза болгондон кийин жашоого көз карашым өзгөрдү.

Ооба, апам кесибин жүрөгү менен сүйчү, өмүрүнүн аягына чейин кесиби менен жашады. Көп убактысын театрда, гастролдордо жүрүп өткөрдү, эс тарткандан бери апам менен гастролдордо жүрүп чоңойдум. Кыргыздын залкар адамдары мени эркелетип жүрүп чоңойдум. Кийин өткөөл курак болгондо эле атам “мектепти жакшы окушу керек” деп талап коюп гастролдорго көп барбай калдым. Апам мага “Ажара, жашоо – элек, өзү эле элеп ордуна коюп коёт. Сен эч нерсеге капа болбо, ордуна келет” деп көп айтчу. Менин жашоодогу адилетсиздикке ыйлап кала турган жайым бар эле.

– Мүнөзү кандай эле, урушчу беле?

– Апам мени урушканы эсимде жок, “Ажарик” деп эркелетип койчу. Өтө жумшак, боорукер, ак көңүл болчу. Такыр бой көтөрчү эмес, апам экөөбүздүн ошол жерибиз окшош. “Жамал Сейдакматованын жалгыз кызы болсо чоёктогон, эрке, бой көтөргөн неме болуш керек” деп сыртымдан ойлошот экен. Сүйлөшө келгенде “өтө жөнөкөй экенсиң” деп аябай таң калышат. Апам кымбат баалуу кийимдерге көңүл бурчу эмес, өзүнө ыңгайлуу кийим кийип алып эле жүрө берчү. Менин кесибиме да киришкен жок, атам англис тилин үйрөнсө жакшы болот деп айтты, ошону менен котормочулук кесипти тандадым.

– Атактуу инсандын кызы болуу кандай сезим? Мектепте артыкчылык берилчү беле?

– Ушул кезге чейин классташтарымдын арасында Жамал Сейдакматованын кызы экенимди билбегендер бар. Андыктан атактуунун кызымын деген сезим болгон эмес, элге белгилүү адам болгон менен, үйдө менин апам эле болчу да.

– Эки бир туугандан кимиси жакын эле апаңызга?

– Агам апамдын изи менен чыгармачылыкка кетти. Ал режиссёр, жеңем актриса Асел Чоткараева. Ошол үчүн алардын сүйлөшкөндөрү, талкуулагандары бир толкунда болчу. Агам жаш чагынан эле театрда иштеди. Менин кесибим башка, үй-бүлөм менен 10 жылдай Москвада жашадык. Ошондуктан бир аз алыс болдум окшойт. Антип да айткым келбей жатат, анткени апам мени менен эч кимге айтпаган сырларын айтып, чогуу көп убакыт өткөрчүбүз. Апам экөөбүзгө тең жакын болду, бирок кайсы бир темада агам менен, кайсы бир темада мени менен жакын болду. Агам экөөбүздүн ортобузда да чоң жаш аралыгы бар, андыктан экөөбүзгө тең мээрими, сүйүүсү кенен жетти.

– “Тунгуч” театрын азыр ким жетектейт, Жамал Сейдакматова деген ысымдын мындан ары да жашашы үчүн кандай иштер жүрүп жатат?

– Агам экөөбүздүн мүнөзүбүздүн бир окшоштугу бар. Элдин алдында сүйлөп, интервью бергибиз келбеген жайыбыз бар (күлүп). Биринчи жолу сизге интервью берип жатам, эмнегедир уяла беребиз. Өзү элдик адам болгон үчүн апам биздин ушул мүнөзүбүзгө таң калчу. “Эмне эле менин балдарым уяла берет элге чыккандан?” деп күлүп калчу. Жеңем да чыгармачыл инсан болгон үчүн үй-бүлөбүздүн атынан бул иштерди жеңем алып барат. “Тунгуч” театрын агам менен жеңем алып кетет. Апамдын атынан фонд түзүлдү, акырындап ишке киришүүдө.

– Өзүңүз тууралуу маалымат айта кетсеңиз?

– 1986-жылы төрөлгөм, апам менен атамдын жалгыз кызымын. Жалгыз кыз болгонум менен, обу жоктонуп эркелеп чоңойгон жокмун. Жолдошум экөөбүздүн ортобузда эки кызыбыз бар, Алина, Карина деген эки кызды тарбиялап жатабыз. Турмушка чыгып, Москва шаарында 10 жылдай жашадык. “Ата-энемдин жанында болоюн” деп кайра мекенибизге келип, учурда мамлекеттик кызматта иштейм.

– Сизге эң жаккан апаңыздын ролу?

– Апам аткарган ролдорунан Каныкейдин ролун жактырам. Ошол монолог күчтүү чыккан деп ойлойм. Курманжан датканын ролу да өзгөчө болгон.

– Күлкүлүү же таасирдүү окуяларын эстеп берсеңиз...

– Апам өзү чыгармачыл адам болгон үчүн үй жумуштарына, аялдын жумуштарына анча жакын эмес болчу. Кыям жасаганда чыгармачылыгын кошуп фантазиясын иштетип, мисалы, малинага карагат кошуп жиберчү (күлүп). Бир жолу эсимде, апам лагман жасайм деп камырды колго чойгон. Анысынын калыңдыгы чыпалактай жоон болуп калган (күлүп). Бир жолкусунда тамак жасап туздун ордуна кумшекер кошуп салыптыр да, тамак ичели десек эле таптаттуу.

– Акыркы жолу качан көрдүңүз? Керээз айттыбы?

– Апамдын жанында эле болуп жаттым. Жакын турчубуз, бат-бат көрүшчү элек. Ушул аралыктарда апам “Ажара, өзүңдү сакта, ден соолугуңду жакшы кара” деп жатты. Кандай күндө жатса да эне экен да, менин маанайымды, көңүлүмдү ар дайым карачу. Көзү жумуларда “балдарым, силерге ыраазымын” деп айтты.

– Атаңыз каза болгондон аз өтпөй эле Жамал апа кетип калды, өтө чоң сүйүү болгон болуш керек...

– Ачыгын айтыш керек, атамдын да, апамдын да экинчи никеси. Мен экөөнүн чоң махабатынан жаралган кызмын. Атамдын мүнөзү катуу, орой, кырс сүйлөгөн адам болчу. Бирок апам бир ачкычын таап алчу. Жинденип кетсе деле апам жоошута алчу. Атам да апама чоң талаптарды коё берчү эмес. “Үйдө бол, дайым тамак болуп турсун, ал-бул” дебей, апамдын табиятын түшүнчү. Атам экөөбүз базарга барып азык-түлүк алып келчүбүз. Азыр ойлосом, бири-бирин издеп табышкан, төп келген адамдар болгон экен. Экөөнүн ортосунда чоң байланыш бар болчу. Атам каза болгондон кийин апам да чөгүп кетти. Ошол үчүн да биринин артынан бири кетип калды окшойт.

– Ажар, чоң рахмат. Жамал апанын артында уул-кызы калганы, анын ысымы дагы далай убакыт жашай турганы элди да сүйүндүрөт болуш керек.

Нуржамал Жийдебаева



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  4 
Комментарийлер(0)
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
26070;
 
Маалымат-маанайшат порталы
2006-2021 © SUPER.KG
Кыргыз Республикасы, Бишкек шаары,
Турусбеков 109/1
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: