реклама
Архив
944   945  
897   898   899   900   901   902   903   904   905   906   907   908   909   910   911   912   913   914   915   916   917   918   919   920   921   922   923   924   925   926   927   928   929   930   931   932   933   934   935   936   937   938   939   940   941   942   943  
844   845   846   847   848   849   850   851   852   853   854   855   856   857   858   859   860   861   862   863   864   865   866   867   868   869   870   871   872   873   874   875   876   877   878   879   880   881   882   883   884   885   886   887   888   889   890   891   892   893   894   895   896  
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836   837   838   839   840   841   842   843  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар

КАНИЕТ (Аңгеме)

№937 19-25-ноябрь, 2020-ж.


Шашканда сааттын жебеси да жүгүрүп калат эмеспи, бул ирет дагы кечикти. Саат 18:40. Бала бакчага далдактап шашып кирип келген Сапар жалгыз калган уулун көрүп өзүн күнөөлүү сезип кетти. Аңгыча тарбиячы Айнаш Болотовна келип кыйкырып уруша баштады.

– Силер кандай немесиңер, балаңар бар экенин унутуп каласыңарбы? Менин да үй-жайым, бала-бакырам бар, сени күтүп соксоюп отура беремби. Эрте келбейсиңерби. Сага канча жолу эскертем? Минтип дагы кеч келе турган болсоңор балаңарды эшикке чыгарып коём!- деп кыйкырып, кирип кетти. Кичинекей Эмир көздөрүн алайтып эжекеси кеткен жакты бир карап, атасын бир карап күрмөсүн кийип жатты.

Күнүгө атасынан ар нерсени сурай берген балакай бүгүн үйгө жеткиче үн катпады. Аны бир ой түйшөлтүп турган эле. Бөлмөсүндө кийимдерин алмаштырып жаткан атасына келип:

– Ата, бүгүн балдардын баарын апалары алып кетти. Менин апам кайда, ал бизге эмнеге келбейт? Ал мени сагынбайбы?- деп суроо артынан суроо узата берди. Сапар бир күнү бул суроону угарын билген, бирок мынчалык эрте болот деп күткөн эмес. Жообу да даяр эмес эле. Көздөрүн балбылдатып, үмүт менен тиктеп турган уулуна “апаң сени таштап кеткен” деп айта алмак беле? Алдагандан башка чарасы барбы?

– Келчи бери. Сен антип ойлобо, апаң сени сагынат. Ал алыс жакта иштеп жүрөт. Сага өзү жүргөн машина, көп оюнчуктарды алып келет, экөөбүз жыргап ойнойбуз.

– Качан келет?

– Апаң жумушу бүткөндө келет, сен ыйлабай жакшы бала болушуң керек,- деп уулун бооруна бекем кысып алды. Ичи туз куйгандай ачышып кетти. Эмир 4 жашка эми толду, балдардан башкача, өтө зирек, баамчыл. Эжекесинен уруш угуп келген атасын аяп, быйтыйган колу менен анын жүзүн сылап, сыналгы турган бөлмөгө чуркап кетти. Сапар шалдайып отуруп калды. Өткөн күндөрдү эстеди, эстебей калган учуру өтө сейрек.

Жанара менен сүйлөшүп жүрүп баш кошушкан. Экөөнүн таттуу махабаты узакка деле созулган жок. Жарым жылча эркелешип жашагандан кийин жашоонун маңызы кеткендей кыжыңдашып уруша башташты.

– Мен Түркияга барып иштеп келем. Муну сага тийгиче эле пландап жүргөм. Мени менен бар, баргың келбесе бул жакта иштей бер, мен кетем.

– Жанара, койчу, сага эмне жетишпей жатат? Бул жакта эле иштеп тур. Иштебейм десең үйдө эле отура бер.

– Мени үйгө камап эмне кыласың? Мен баары бир кетем.

“Түркияга таежемдерге кетем” деген сөздөн улам күнүнө бир маал уруш орун алчу болду. Кетем деген сөзүнөн кайтпай жүргөн күндөрү Жанара кош бойлуу экенин билди. Анда балалуу болуу, аны багуу тууралуу ой жок болчу. “Дагы да үлгүрөм, азыр жашмын, боюмдан алдырам” деп дегдеп турду. Сапардын үй-бүлө күтүп, балалуу болуп ынтымактуу жашасак, жубайым мени күндө үйдөн күтүп алса деген изги кыялдарын таш капты. Сүйүп жүрүп алган жубайы бат эле беттен алган, сүйлөйүн десе ооз ачырбаган ажаан аялга айланып калганына кейиди.

– Бала буту-колду кармайт. Азыр балалуу болууга эрте, алдырам.

– Алдырба, алдырам дегенге кантип оозуң барды?

– Анда эмне, төрөп, бала багып, ага байланып үйдө отуруп калайынбы? Тууган-туушканыңа кызмат кылып, эч жакка чыкпай жаныңда жүрө беришим керекпи? Мен түйшүксүз жашоону каалайм.

– Үйдө кайдагы түйшүк, менин жалгыз апам бар, ал өзү менен өзү. Сен эч кимдин кирин жууп, тамагын жасабай элесиң го.

Кыз-жигит кезинде акчасын алып, эркелеп жүргөн кыздын көздөгөнү эмне эле? Баш кошуп, бактылуу болуп, бирөөнү бактылуу кылуу эмес беле...

Акыры Жанара баланы төрөй турган болду. Төрөгөндөн кийин Сапар ага эркиндик берерин, чет жакка жөнөтөрүн убадалады. Анткен менен ичинде “балалуу болсок өзгөрөт” деген үмүтү бар эле. Оозунан чыкканын алып келип жакшы эле аракет кылды. Бирок Жанарада энелик мээрими ойгонгон жок. Чүрпөсүнүн үстүнө үйрүлө түшүп жакшы көрө албады. Өз баласына ушунчалык муздак, ушунчалык жоопкерчиликсиз караган эне болобу?

Эки жарым ай араң эмизди. “Кетем, сенин айтканың болду. Эми убадаңды аткар” деди бир күнү. Ушундай мерез адамды сүйүп, жандап жүргөнүнө өкүндү күйөөсү. Аттиң, өткөндү өзгөртө алса го.

– Апа, кантебиз? Жанаранын бала караганга такыр көңүлү жок. Кетем дегенинен жазбады, кичинекей немени кантип багабыз?

– Балам, кейибе, жумуштан чыгам, мен багам. Сен иштей бересиң. Бир баланы чоңойто албай эмне болуптурбуз? Мейли, кетсе кетсин, жайына кой. Андай мурдунан алысты көрө албаган немени кыйнап бүлө кыла албайсың.

Баары убадалашкандай болду, Сапар баарын даярдап берди. Жанара тогуз ай көтөрүп жарыкка алып келген уулун кызыл эт кезинде таштап, түйшүксүз жашоону көздөп Түркияга учуп кетти. Түйшүксүз жашоо... Тирүүлүктүн өзү түйшүк менен коштолорун эмнегедир түшүнгүсү келген жок. Бала төрөп, күйөөсүн тамак жасап күтүп алган, үй-бүлө жүгүн кошо тартышкан аял болууну каалабады. Ээн басып, эркин жүргүсү келди.

Эне-уул кичинекей чүрпөнү айланып эле жүрүштү. Эмне кылышсын, кээде чыркырап ыйласа коркушат. Анын үстүнө ыйлаак эле. Сапар жумуштан келип, тамактанып эле апасы көз ирмеп алса дейт:

– Апа, сиз эс алыңыз. Эмирди мен карайм. Кечке жаныңыз тынбайт, ооруп каласыз.

– Кой, уулум, мен үйдөмүн. Сен керели кечке жумуштасың, чарчадың да, өзүң эс ал,- дейт. Баласын аяганы менен, 3 операцияны башынан кечирген Айша апа үчүн бала багуу жеңил эмес эле. Ачка болуп чыркырап ыйласа Сапардын айласы куруп кетчү. Сүт даярдап берет, терметет. Тынч алып уктап калса кубанат. Ошентип Эмир да 1 жашка толду. Күндөн-күнгө небересинин жаңы кылыктары чыгып, чоң эненин кубанычында чек жок. Атасы жумуштан үйгө келүүгө шашат. Ага уулун күлдүрүп ойноткон ушунчалык жакчу. Эне, уул, небере. Бири-бирин карап ичинен каниет кылып калышат.

Күн жакшы башталып, жакшы бүтсө кандай сонун. Сапар адаттагыдай жумуштан шашып келип уулу жаткан бөлмөгө кирип, жерде жаткан апасын көрүп жүрөгү оозуна кептелди. Кыйкырган үнүнөн бала ойгонуп, кошуна эже чуркап жетип келди. “Тез жардам” чакырышты. Жүрөгү эбак токтоп калган экен. Үй ичи ызы-чуу түшүп калды.

– Жок, апам өлбөшү керек! Жок, силер жаңылып жатасыңар!..

– Уулум, өзүңө кел, балаңды ойлосоңчу,- деген кошунасы Кадыр карыянын сөзү Сапарды эсине келтирди. Тура калып уулун көздөй жүгүрдү. Кошуна эжесинин колунда ыйлап жаткан баласын алып, бооруна бекем-бекем кысып алды.

Мына андан бери 3 жыл өттү. Бул 3 жыл бир өмүргө тете болду. “Сени, балаңды багам деп жүрүп өлдү” деген таякелеринин сөздөрү Сапардын сөөгүнө жетчү. Кээде баарынан коргоп турган апасын эстеп өксүсө, Эмирин карап кайрат кылат. Улуу таежеси менен кошуна эжеси балага көп каралашты. Кээде акча табуу үчүн бир апта иштей койчу. Уулун бала бакчага бергенине бир жарым жылдай болду. Үйлөрдү оңдоп-түзөп иштейт. Бирде тыгында калса, бирде жумушта кармалып калат. Минтип бүгүн да баласын алууга кечигип келди.

Шалдайып отуруп калган атасынын оюн чуркап келип моюнуна асылган Эмир бузду.

– Ата, турбайсыңбы, тамак жебейлиби? Кечке отура бересиңби?

– Ооба, азыр тамак жейбиз,- деп чекесинен өөп, ашканага жөнөдү.

– Телевизордо “Тачки” болуп жатат. Мен көрүп турам.

Уулум, сен менин тирегимсиң. Көрөр карегимсиң. Эненин ордун толуктай албайм дечи. Бирок мен сен үчүн отту да, сууну да кечүүгө даярмын. Сенин барыңа каниет кылам. Сен кейибе, сенин жүзүң күлүп турсун. Мага ошол жетиштүү”,- деп ойлоно Сапар ашканада жумуртка кууруп жатты.

Ушул үй-бүлөнүн мүчөсү болууга кудурети жетпей, эркин жашоону эңсеп, жеңил жолго түшүп кеткен эне аны күткөн уулу тууралуу ойлоор бекен? Уулун ушунчалык катуу сүйгөн ата, мыкты жолдош боло турган адамдан кол жууганын түшүнөт болду бекен? Ким билсин, балким, жеңил ою жеңил жашоого биротоло сүңгүтүп салгандыр...

Миран



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  -1 
Комментарийлер(1)
26.11.2020. 11:15 
Тайпасы:
Жаран
Комментарийлердин саны:
33
Катталган:
06-07-2014
Соӊку аракети:
21-12-2020 11:04
Жынысы:
Белгисиз
0
Jawym toktoboi akty go((
aniraz.zari түзөттү 2020-11-26 11:17:11
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
25035;
 
Маалымат-маанайшат порталы
2006-2021 © SUPER.KG
Кыргыз Республикасы, Бишкек шаары,
Жибек Жолу проспектиси 381
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: