Архив
897   898   899   900   901   902   903   904   905   906   907   908   909   910   911   912   913   914   915   916   917   918   919   920   921   922   923   924   925   926   927   928   929   930   931   932  
844   845   846   847   848   849   850   851   852   853   854   855   856   857   858   859   860   861   862   863   864   865   866   867   868   869   870   871   872   873   874   875   876   877   878   879   880   881   882   883   884   885   886   887   888   889   890   891   892   893   894   895   896  
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836   837   838   839   840   841   842   843  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар

Назира Айтбекова, актриса: “АТА-ЭНЕМДИН АЖЫРАШКАНЫ ЧОҢ ЭНЕМ ЭКӨӨБҮЗДҮН СҮЙҮҮБҮЗДҮ ЖОК КЫЛДЫ”

№931 8-14-сентябрь, 2020-жыл


Өзү чыканактай кыз, бирок жасаган иши чоң. Кеңсеге келип маек берип кеткенден кийин карасам коомдук иш-чаралардын биринде жүрөт. Ушундай кызыктуу кыз. Мындай кызды ким тарбиялады? Бул жолу алпаруучу апасы тууралуу баяндайт.

– Назира, бүгүн апаң тууралуу сүйлөшөлү деп чакырдым. “Апам элдин назарында болгусу келбейт” дедиң эле.

– Апамды маекке көп чакырышат. Бирок баргысы келбейт. Элге өзүнүн дүйнөсүн көрсөткүсү келбеген жабык мүнөз адам. Апам калжыңдап мага окшоп сүйлөй бербейт, созулуп бир калыпта жүргөн адам. Мага окшоп фонтан болуп атылып турбаган жан.

– Андай ападан сендей кыз кантип жаралып калды экен?

– Ачык, шайыр жүргөнүм атама окшош. Бир чети тарбиядан да болуш керек. Апамдын убагында тарбия башка эле, тыйган нерсе көп болчу. Мени апам эркин тарбиялады. “Кой, антпе, минтпе” деген чектөөлөр болгон жок. Ошондон улам фонтан болуп атылып калдым окшойт. Апама өңү-түсүм, сымбатым окшош.

– Блогдоруңда чоң энең тууралуу көп жазасың...

– Менин балалык дүйнөмдө чоң энем эле болчу. Ортобузда укмуштай жакындык бар эле. Дааратканага кирсе, этегин кармап турчумун. Мени канча айымдан тарта экенин так билбейм, ата-энем студент болгону үчүн чоң энем баккан экен. Киндигим үзүлгөндөн эле чоң энем менен болуп калдым. Кийин атам менен апам окуусун бүтүрүп келгенде чогуу жашап калдык, бирок мен чоң энемдин бөлмөсүндө жашачумун. Алардын бөлмөсүнө жолоп калсам эле таарынчу. Кээде ата-энемдин бөлмөсүнө аябай киргим келчү. Ата-энем экөө тең музыка сабагынан мугалим эле, апам комузун кыңгыратып, атам чопо чоорун ойноп жатса алар менен аралашкым келчү. Бирок чоң энемден коркуп, жакындай алчу эмесмин. Ата-энемди агам менен эжемдей көрчүмүн, ошогобу, мен үчүн алар чоочун дүйнө болуп калды. Азыр деле апам экөөбүз эне-баладай эмес, эже-сиңдидей мамиледебиз. Чоң энем мени колтугуна катып эле эч кимге жолотпой кызганып жатып, өз ата-энемден оолак болуп калдым. Жакында атам менен жолукканда “кичинеңде аябай өпкүлөп колума алганга кызыксам да, энемен жазганып, анте алчу эмесмин” деп айтып жатпайбы.

Чоң энем болуп көрбөгөндөй сүйүүгө толо адам эле. Башка деле неберелери бар болчу. Бирок энелер эң бечелин жакшы көрөт эмеспи, мени көбүрөөк сүйдү. Кагылып-согулуп, көзүм менен тең айланып турчу. Бала ошону сезет, аны эки эсе кайтарат. Кичинемден астма болуп ооручу элем, түнү менен далыма таптап чыкчу. “Ташка тийген жөтөл, ай” деп кейип, түнү менен көз ирмебей мени карачу.

Ата-энем ажырашып кеткенде 9 жашта болсом керек, “эки дөө кагышса, ортосунда кара чымын кырылат” болуп чоң энем экөөбүз куураганбыз. Экөөбүздүн ажыраганыбыз бир ааламды зордоп экиге бөлгөндөй эле болду. Бири-бирибизди издеп ыйлачу элек. Мектепке издеп келчү, “менин кызым ушул жакта окуйт эле, Нази-и!” деп мектептин алдында турчу, байкушум. Мен мектептен чыгып эле басып жыгылам, экөөбүз кучакташып ыйлайбыз. Ал күндөрдү эстесем жаман болуп кетем. Энем байкуш мени издеп жүрүп каза болуп калды. Бул мен үчүн оор жоготуу болду.

– Чоң энең, атаң, уулуң тууралуу блокторуңда жазасың, бирок апаң тууралуу жазбайсың. Эмнеге?

– Апам уруксат бербейт. “Мени коомдук адамга айлантпа, андайды жаман көрөм” дейт. Анын тынчтыгын бузгум келбейт, эл түрдүү болот да. Мен болсо андай тепкиге көнүп калгам, чыдай берем. Апама андай кепти жолоткум келбей, коргойм. Апам экөөбүз көп кыйынчылыктарды көрдүк. Таятамдар колдоп турушту, бирок ар бир адамдын жашоосу өзүнчө да. Борбордо батирден батирге көчүп жүрдүк. Экөөбүздүн тең чачтарыбыз жер чийгендей узун эле, кышында жууп койсок учу тоңуп калчу. Ызгаар суукта желим бөтөлкөгө ысык суу толтуруп алып кучактап жаткан күндөр болду. Кандай күндөр болбосун апам мага “сен бийик уча турган кушсуң, сен уча аласың” деп көп айтчу. Апам болбогондо мындай Назира болбойт белем. Анткени мага “сенин колуңдан бул келбейт, сен эл катары эле турмушка чыгып жашай турган кызсың” десе, балким, менден башкача Назира чыкмак. Сынып турганда жөлөк болот, учуп-күйүп калсам токтотуп турат. Жашоомдо апамдын акылын көп уктум. Апамды сүйүндүрүш үчүн жалаң “5” деген баага окудум. Өз күчүм менен окууга өттүм. Азыркыга чейин ар бир ийгилигим апам үчүн. Студент кезимде апам 2000 сом маяна алып иштечү. 1200 сомун жатаканама төлөчү, 300 сом тамак-ашыма берчү. Өзү калган акчасы менен эптеп жашачу. Кийин “Хит-парадга” чыгып калганда да тапкан-ташыганын мага чаптады. Ал жерден жарытылуу акча алчу эмесмин. Телеге чыкканыма сүйүнүп эле болгонун мага чаптачу. Кийин балам төрөлгөндө баламды багышты, иши кылып мага жөлөк-таяк болуп келе жатат.

– Ата-эне аткарылбай калган максатын балдары аткарышын каалайт эмеспи. Силердин мамиледе андай болгон жокпу?

– Мен дайым өзүмдүн жүрөгүмдөгүнү жасадым. Котормочулук кесибим апама майдай жакчу, кийин телеге кетип калганымда деле колдоду. Актрисалыгымды да колдоду. Мага эч качан өзүнүн каалоосун арткан учур болгон жок. Ата-энем чыгармачыл адам болгондон кийин баары бир мен деле ошол жакка кетмекмин. Апам муну жакшы түшүнчү жана менин потенциалым бар экенин биринчи көргөн адам.

– Айланып, кагылып, сүйүүсүн ачык көрсөткөн энелер бар, ичинен сүйүп, сүйүүсүн көрсөтө албагандар бар, сеники кайсынысына кирет?

– Меники ичинен жакшы көргөндөргө кирет. Өөп-жыттап, кучакташмай дээрлик жок. Дистанция бар, көрүнгөн темада сүйлөшө албайбыз. Бул мурунку муундун тарбиясы болсо керек. Уулум экөөбүздө андай дистанция жок, өөп-жытташа беребиз. Өбүшүп-жытташкан сезим кандай сезим болду экен деп кызыгып калам. Ал башынан түптөлүп калган, ошондуктан ал нерсе жетишпейт деп айта албайм. Мага апамдын карааны, дем-күчү эле жетишет.

– 22 жылдан кийин атаңды таап, аны менен катташканыңды апаң кандай кабыл алды?

– Таарынды. 22 жыл бою көмөк көрсөтпөсө, сурабаса, келбесе, болгон түйшүгүмдү апам жалгыз тартса, анан кийин мен атамды издеп кетсем башка эне деле таарынмак. Ага аябай катуу тийди. Бирок атамды тапканым апамды чийип басып кеткеним эмес да. Мен бул нерсени өзүм үчүн жасадым. Көкүрөгүм тынчышы үчүн кылдым. Апама “сенин ордуң башка, анын орду башка, көкүрөгүм кенен, баарың батасың” деп айттым. Азыр баары жайына келди. Атам экөөнүн сүйүүсү, жаштыгы тууралуу айтып берсе аябай кызыктуу болду.

– Апаңдан алган эң чоң турмуштук сабак кайсы болду?

– Сабырдуулукту алдым. Үйдө укмуш нерсе болуп жатса да дардаңдап, жетине албай көрүнгөнгө айтып кетпейт. Бир калыпта. Мен желпилдеп, жеңилмин, апам оор басырыктуу. Ооздуктап турат. Апамдан алган эң чоң сабагым ушул болду. Мектепте “тилиң буудай кууруйт, апаңды чакырчы” дешет, чакырып келсем эле апам созулган, маданияттуу, интеллигент болуп чыга келет. Баары таң калышчу.

– "Бардык ийгиликтеримди апам бактылуу болсун деп кылдым" дедиң. Акыры апаңды бактылуу кыла алдыңбы?

– Бала катары апамды бактылуу кылдым деп ойлойм. Барган жеринен “Айтбекованын апасы” деп сыйлуу жерге отурат. Көп адамдар мен аркылуу апам менен катышкысы келет. Ушундай жерде сыймыктанат болушу керек. Бирок аны деле айта элек (күлүп). Бирок мен башым менен жер казсам деле күйөөнүн ордун толтура албайм. Апам жалгыз отурбай, чай ичкен адамы болсо деп санааркайм. Атам тиги жакта, апам бул жакта жалгыз. Бул мени бала катары аябай түйшөлтөт. Акыл калчап, таразалап отуруп ойлоном, жалгыздык жакшы деле эмес экен. Азыр го апам жаш, өзүнүн чөйрөсү бар, мектеби бар. Кийин эмне болот деп ушуга көп санааркап калам.

– Бул баланын апасынын алдында күнөөлүүмүн деген сезимден улам эмеспи?

– Ооба, башында апамдын багын мен байлап койгондой сезилчү. Мен болбосом турмушу башкача болот беле деген нерсе бар болчу. Өзүмдү күнөөлүү сезчүмүн. Ошон үчүн апамдын боштугун толтурганга жан талашсам керек. Бирок психологдун жардамы менен мындан арылдым. Жалгыз болуу апамдын тандоосу болгон экен. Мен мисалы, балам үчүн жашабайм. Анын өз турмушу бар. Мен болгону ага жардам берем. Анткени балам менин алдымда күнөөлүү болуусун каалабайм. Эгерде жакшы адамды таап турмуш куруп кетсем, ал менин чечимим. Бала үчүн эненин бактылуу болуусу ушунчалык маанилүү.

– Апаңдын кайсы тамагы жагат?

– Апам экөөбүз бул жерде да эки өңдөйбүз. Ал түрлөп тамак жасаганды жакшы көрөт. Мен ашкананы көргүм келбейт. Атайын кулинардык курстарга барып өнөрүн өркүндөтүп турат. Бардык тамакты жакшы жасайт. Өзгөчө камыр тамактары сонун болот. Тикмечилик кылып сайма саят, үй тазалап, бала багып эле күйөөсүн күтүп отурчу аял. Бир күйөөнүн бактысын ачмак. Ушуга чейин эле апам курактууларды чактай берем. Апам карыган кезде башы айланып сүйүп калса деп кыялданам.

– “Жөн эле ойлор” деп блог жазып китеп чыгардың, апаң буга кандай карады?

– Башында жазып баштаганда апам сын айта берчү. “Эл эмне дейт, ушинтип да жазасыңбы?” дей берчү. Анан апамды блоктоп салгам. Туура кылыптырмын, апамдын оюн угуп жазбай койсом бүгүнкү күнү китебим чыкпай калмак. Блоктоп коюп ойлорумду тынбай жаздым, анан китебим чыкканда белек кылып берип койдум. Момоюп, ыраазы болуп отуруп калды (күлүп).

– Аягында апаңа ыраазычылык айта кетсең туура болот окшойт.

– Апама чындап ыраазымын. Бир жолу “апа, ырас эле сен менин апам болуп калыптырсың” дегем. Апамдын мага болгон ишеними, тартиби, тарбиясы болбосо, мен элдин эрке кызы болуп жүрмөк эмесмин. “Сен башкачасың, сен бийик учасың, сен жасай аласың” деп аябай көп айтты. Атама да ыраазымын. Атам менен сүйлөшүп отурсам эзилип мени карап отурду да, “кызым, сен апаң экөөбүздүн эң жакшы сапаттарыбызды алыптырсың. Жакшы кыз болуп чоңоюптурсуң” деди. Мен “ушу жакшы кызды апам жасады, ата” дедим. Ырас эле бул турмушта эки адам кезигип, мени жаратып коюшуптур. Ыраазымын!

– Апаң маекти окуса ыраазы болот болуш керек. Сага жана жөн эле ойлоруңа ийгилик!

Нуржамал Жийдебаева



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  5 
Комментарийлер(5)
13.10.2020. 08:35 
Тайпасы:
Жаран
Комментарийлердин саны:
10
Катталган:
17-06-2020
Соӊку аракети:
13-10-2020 14:02
Жынысы:
Белгисиз
-1
Азаматсын Назира. Ушундай жакшынакай, сулуу болуп журо бер. Кыргыздын кыз келиндери жайыма сулуу болуп, чачынарды кое берип, жасанып журо бергиле
14.10.2020. 21:30 
Тайпасы:
Жаран
Комментарийлердин саны:
4
Катталган:
08-10-2015
Соӊку аракети:
24-10-2020 14:14
Жынысы:
Белгисиз
0
asyl1998,чачын чачса сага не
13.10.2020. 13:37 
Тайпасы:
Жаран
Комментарийлердин саны:
24
Катталган:
30-10-2019
Соӊку аракети:
24-10-2020 09:36
Жынысы:
Белгисиз
-2
Азаматсыз бар болунуз сиз чын эле уча аласыз атаныз мн апанызды жараштырып койсонуз сонун болмок
13.10.2020. 14:05 
Тайпасы:
Жаран
Комментарийлердин саны:
6
Катталган:
17-06-2020
Соӊку аракети:
16-10-2020 18:13
Жынысы:
Белгисиз
+2
Мыкты айымсын.
13.10.2020. 15:05 
Тайпасы:
Жаран
Комментарийлердин саны:
511
Катталган:
04-12-2018
Соӊку аракети:
16-10-2020 00:33
Жынысы:
Белгисиз
Калаасы:
Москва
+2
Обу жок аял.Элдин көзү менен өзүн бир карап алса жакшы болмок.Анан эч качан сынды туура кабыл албайт.Сындаган адамды мени көрө албагандар деп баалайт.Мен бир жолу сындап жазгамын.Ошол сындан сабак алса деп ойлогом.Тилекке каршы,мени душман катары кабыл алды.Мейли,ар ким күнөөнү өзү үчүн жасайт,өзү жооп берет.Инсан катары айтып коюш биздин парз.
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
24625;
 
Маалымат-маанайшат порталы
2006-2020 © SUPER.KG
Кыргыз Республикасы, Бишкек шаары,
Жибек Жолу проспектиси 381
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: