Архив
897   898   899   900   901   902   903   904   905   906   907   908   909   910   911  
844   845   846   847   848   849   850   851   852   853   854   855   856   857   858   859   860   861   862   863   864   865   866   867   868   869   870   871   872   873   874   875   876   877   878   879   880   881   882   883   884   885   886   887   888   889   890   891   892   893   894   895   896  
792   793   794   795   796   797   798   799   800   801   802   803   804   805   806   807   808   809   810   811   812   813   814   815   816   817   818   819   820   821   822   823   824   825   826   827   828   829   830   831   832   833   834   835   836   837   838   839   840   841   842   843  
740   741   742   743   744   745   746   747   748   749   750   751   752   753   754   755   756   757   758   759   760   761   762   763   764   765   766   767   768   769   770   771   772   773   774   775   776   777   778   779   780   781   782   783   784   785   786   787   788   789   790   791  
687   688   689   690   691   692   693   694   695   696   697   698   699   700   701   702   703   704   705   706   707   708   709   710   711   712   713   714   715   716   717   718   719   720   721   722   723   724   725   726   727   728   729   730   731   732   733   734   735   736   737   738   739  
635   636   637   638   639   640   641   642   643   644   645   646   647   648   649   650   651   652   653   654   655   656   657   658   659   660   661   662   663   664   665   666   667   668   669   670   671   672   673   674   675   676   677   678   679   680   681   682   683   684   685   686  
583   584   585   586   587   588   589   590   591   592   593   594   595   596   597   598   599   600   601   602   603   604   605   606   607   608   609   610   611   612   613   614   615   616   617   618   619   620   621   622   623   624   625   626   627   628   629   630   631   632   633   634  
531   532   533   534   535   536   537   538   539   540   541   542   543   544   545   546   547   548   549   550   551   552   553   554   555   556   557   558   559   560   561   562   563   564   565   566   567   568   569   570   571   572   573   574   575   576   577   578   579   580   581   582  
479   480   481   482   483   484   485   486   487   488   489   490   491   492   493   494   495   496   497   498   499   500   501   502   503   504   505   506   507   508   509   510   511   512   513   514   515   516   517   518   519   520   521   522   523   524   525   526   527   528   529   530  
427   428   429   430   431   432   433   434   435   436   437   438   439   440   441   442   443   444   445   446   447   448   449   450   451   452   453   454   455   456   457   458   459   460   461   462   463   464   465   466   467   468   469   470   471   472   473   474   475   476   477   478  
374   375   376   377   378   379   380   381   382   383   384   385   386   387   388   389   390   391   392   393   394   395   396   397   398   399   400   401   402   403   404   405   406   407   408   409   410   411   412   413   414   415   416   417   418   419   420   421   422   423   424   425   426  
322   323   324   325   326   327   328   329   330   331   332   333   334   335   336   337   338   339   340   341   342   343   344   345   346   347   348   349   350   351   352   353   354   355   356   357   358   359   360   361   362   363   364   365   366   367   368   369   370   371   372   373  
264   265   266   267   268   269   270   271   272   273   274   275   276   277   278   279   280   281   282   283   284   285   286   287   288   289   290   291   292   293   294   295   296   297   298   299   300   301   302   303   304   305   306   307   308   309   310   311   312   313   314   315   316   317   318   319   320   321  
217   218   219   220   221   222   223   224   225   226   227   228   229   230   231   232   233   234   235   236   237   238   239   240   241   242   243   244   245   246   247   248   249   250   251   252   253   254   255   256   257   258   259   260   261   262   263  
176   180   181   182   183   184   185   186   187   188   189   190   191   192   193   194   195   196   197   198   199   200   201   202   203   204   205   206   207   208   209   210   211   212   213   214   215   216  
Популярдуу макалалар

ЭРТЕ ӨЧКӨН ЖЫЛДЫЗ… ЗАЛКАР ТӨКМӨ АКЫН, ОБОНЧУ, ЫРЧЫ ЭЛМИРБЕК ИМАНАЛИЕВДИ ЗАМАНДАШТАРЫ ЭСКЕРЕТ

№909 7-13-май, 2020-ж.


Бүтүндөй кыргыз элинин кабыргасы кайышып турган учур. «Элмирбек Иманалиев көз жумду» деген суук кабар ар бир кыргыздын жүрөгүн тилип кетти. 42 гана жашта эле. Ырдалбаган ырлары, жарата элек обондору, тарбиялай элек шакирттери али көп болчу. Бирок тагдырга моюн сунбаска арга жок. Замандаштары, жакындары бүгүн төрт тарабы төп келишкен талантты жоктоп, көзгө жаш ала эскерип турган маал.

ЧАНДА КЕЗДЕШКЕН ТАЛАНТ ЭЛЕ

Алп акын, обончу, аткаруучу, дастанчы Элмирбек Иманалиев сахнага эрте аттанган. 5 жашында колуна комуз кармап, 12 жашында төкмөлүккө алгачкы кадамын таштайт. 15 жашында филармониянын чоң сахнасында республикалык акындар айтышына түшүп, баш байгени жеңип алган. Ага чейин эле кичи мекени Токтогулда аты чыга баштаган Элмирбек мырзаны белгилүү төкмө акын Тууганбай Абдиев атайын айылына издеп барып, ырдатып көрүп эле «сенден төкмө акын же жазма акын чыгат. Айылда жүрсөң чөйрөң кандай болот ким билет, шаарга жүрү» деп апасынын уруксатын алып шаарга алып кеткен. Ошондон баштап Тууганбай Абдиевдин шакирти болуп, чыгармачылыктагы улуу жолу башталган. Бул жол чындап улуу болду. Өмүрүнүн 27 жылын төкмөлүк, обончулук, акындык өнөргө арнады.
Элди сүйдү, эл аны эселеп жакшы көрдү. Жашоосунда сүйүүсү да, күйүтү, кубанычы да болду. Аз болсо да өрнөктүү өмүр сүргөн алп таланттын артында "Булбулум", "Аруузатым" сыяктуу обондуу ырлары, кыргыз-казакты бирдей суктандырган керемет айтыштары, көптөгөн шакирттери менен кошо 3 кызы, 3 уулу калды. Кырчындай курагында залкардын өмүрү менен бирге комузунун кылы да үзүлдү.

Кубат Болотканов, досу: «ДАРТЫНАН УЛАМ КӨЗ АЙНЕК КИЙИП КАЛГАН»

– Элмирбек экөөбүз борборго келгенде таанышып, жакын болуп калган элек. Анда экөөбүз тең жаш балабыз. 1992-жылдан ушул убакка чейин жакшы мамиледе болдук. Элмирбектей адамдар кылымда бир жаралат. Заманыбыздын ойчулу эле, өтө билимдүү болчу. Китепти баса калып окучу. Биз таң атканча сүйлөшөр элек, түрдүү темада сүйлөшүп черибиз жазылып калчу. Акыркы жолу 15-20 күн мурун жолукканбыз. Көз айнек кийип калган акыркы учурларда. «Ушуну тагынбай эле койсоңчу» десем, «мен эле тагынайын деп жатат дейсиңби, көз жакшы көрбөй калып жатат» деген. Кант диабети менен ооругандардын көзү да жакшы көрбөй калат тура, көп жылдан бери бул дарт менен алышып келе жаткан.

Досум, Кудай берген адам элең. Сөзү да сонун, өзү да сонун, ырың да, сырың да укмуш болчу. Түгөнгүс кенч болчусуң, мага сахнада ачыла албай калгандай сезилчүсүң. Комуз черткениң, манас айтканың... Терең элең, кенен элең, айкөл элең. «Кыргыз ким?» десе, сени көрсөткүм келчү. Кулактын моокуму канбай калды. Тоодо, талаада, калаада, үйдө сага тоюп калуу мүмкүн эмес эле. Кош, досум, тынч жат...

Изат Айдаркулова, шакирти: «АКЫРКЫ ЖОЛУ ООРУКАНАГА БАРЫП, УСТАТЫМДЫ КӨРҮП КЕЛГЕМ»

– Элмирбек агайдай адамдар дүйнөгө аз келет. Устатым менен 2015- жылы Ош шаарында жолуктум, агай бир жакшылыкка барган экен. Учак менен учарына бир эле саат калса да «сиңдимдин өнөрүнө күбө болуп коюңуз» деген эжемдин көңүлүн калтырбай, бир саат сүйлөшүп отурдук. Аябай сонун сүйлөчү, тилинен бал тамып жаткандай болчу. Агай менен сүйлөшкөн бир саат тагдырыма бурулуш жасагандай сезилди. Көөдөнүм толуп, тим эле акын болуп кеткендей жан дүйнөм ырга бөлөнгөн эле. Агайдын айтуусу менен борборго келип, шакирти болуп калдым. Өтө жөнөкөй адам эле. Ар бирибизге мүнөзүбүзгө жараша мамиле кылчу. Ким эмнени көтөрө алат, билер эле. Акындыкка эле эмес, жашоого да такшалтчу. Башынан өткөргөндөрүн көп айтып берчү. Сабак алгыла деп калчу.

Устатым менен бир ай мурун кезиктим. Ал кант диабети менен ооруп жүрчү, ооруканага жатып калыптыр. Байланышсам «эртең чыгам» деди. Баламды көтөрүп алып барып жолугуп, көпкө сүйлөшүп отурганбыз. Агай ооруп жүргөнү менен, өзүн жакшы күтчү. Акыркы жолу ооруп калганын билген эмесмин.

Кечинде социалдык тармактан көрүп нес болуп калдым, акындардан сураштырсам чын экен (ыйлап). Гүлбү эжеден 2 кызы бар эмеспи, Нурзат жеңеден 3 уулу, бир кызы бар. Кичүүсү бир жашка чыгып калды окшойт. Нурзат жеңем аябай жакшы аял, чыгармачыл адам менен жашаган оор эле го, агайдын сөзүнөн чыкчу эмес. Диетасын иреттеп аябай жакшы карачу. Дагы деле устатымдын көзү өткөнүнө ишене албай турам.

Токтобүбү Черикчиева, ырчы: «ЭЛМИРБЕК КАТУУ СҮЙЛӨБӨГӨН ЖАН ЭЛЕ»

– Суук кабарды түндө уккандан бери жан дүйнөм эңшерилип жаман болуп жатам. Интернетти ачкым келбей, телевизор көргүм келбей отурам. Арстан акын, алп акыныбыздан айрылдык. Бардык чындыкты бетке айткан, эч нерседен коркпогон, тайманбаган акын эле. Айрыкча акыркы кезде баарын түз айта баштаган.

Канатыбыз кайрылды, эң чоң талантты жоготтук. Акын гана эмес, керемет обончу эле. Элмирбек менен канча иштешип калдык, бир да адамга катуу сүйлөбөгөн жан эле. Экөөбүздүн мамилебиз аябай жакшы болчу. Жамандыгы жок, күлүп-жайнаган бала кыял эле. Кенедейибизден филармонияга келдик да. Чогуу жүрүп, чогуу өстүк. Кийинки убактарга чейин жолуккан жерден саламыбыз түз болду. Элмирбектин «Карап, карап» ыры менен дүң этип, дагы бир жолу көтөрүлгөм. Ошондо келип «талантыңызды сыйлайм, ыраазымын» деген эле. Кайсы жерден жолугуп калсак да «бул Токо эжемдин ыры. Сиз ырдаңыз, сизден кийин биз ырдайлы» деп калчу. Мен ага аябай ыраазымын, жерге жаксын. Мен аябай жаман болуп жатам (ыйлап).

Элмикем кыргыз эли чыгаан инсандарынан айрылганда коштошуп боздоп турчу эле. Ушундай алааматта эл адамынан айрылып калганыбызга күйүп жатам. Кыргыз эли жапырт көчүп барып топурак салмак элек. Эми эмне кылабыз? Ошого кабатыр болуп жатам. Элмирбектин ооруп жүргөнүн билчү эмесмин. Намаз окуп жатканын угуп сүйүнүп калган элем.

Баян Акматов, төкмө акын: «ЭЛМИРБЕК БАЙКЕ ЖАКШЫ СЫНДАРДЫ АЙТЧУ»

– Айтышка келгени Элмирбек байкени жакшы тааныйм. Өзү көрөңгөлүү, ар тараптуу инсан эле. Жакшы сынчы болчу. Жаш акындар келгенде кимдин кандай артыкчылыгы, кемчилиги бар, дароо билип койчу. Анан көңүлүнө жагып калган шакиртине жан үрөп убактысын аябай үйрөтчү. Мен Эстебес атабыздын үнүнө, андан кийин эле Элмирбек байкенин үнүнө кызыкчу элем. Дастан айтчу, манас айтчу, поэзия, төкмөлүк, обончулук, айтор, төрт тарабы төп келген талант болчу. Жоготуп алдык, жаман күндө турабыз. Бейишин берсин!

Жакында «Айтыш» сынагы болгон, ошондо өзүнүн сын-пикирин балдардан айттырып жибериптир. «Маанайың пас, эмне маселең бар? Акын майрамдагыдай маанайда айтышыш керек, акын ошол ирмемде жашап айтышышы зарыл» деген экен.

Баарын кучагына батырган даркан талаа эле. Дагы бир өзгөчөлүгү – кыргыз эли шайыр-шатман, опур-топурду сүйгөн калк эмеспизби, ал жалгыздыкты жакшы көрчү, ойчул эле. Лирик болчу, өз дүйнөсүндө жалгыз калганды жакшы көрчү.

Тынар Курбаналиев, куудул: «ӨЗҮМДҮ КОЁРГО ЖЕР ТАППАЙ ТУРАМ»
– Жакшы адам дүйнө салган кезде ал тууралуу сөз таппай калат экенсиң. Ошентсе да досум тууралуу эки ооз сөзүмдү айтайын. Комуз кармап, акындык өнөрдү аркалап, акындар менен жүрбөсөм дагы, Элмирбек менен бир ирет тойдон көрүшүп, таанышып калдым. Ошол түнү экөөбүз түн бир оокумга чейин баарлаштык. Чындыгында, өзгөчө адам эле, анын адамгерчилиги, шайыр мүнөзү жанда жок. Ошол күндөн бери ар дайым ал-абалыбызды сурашып, достук мамиледе жүрдүк. Жашоомдо жакын достордон айрылган күндөрүм болду, бирок арасынан эң эле оор жоготууга бүгүн учурап турам. Азыр Жалал-Абадда элем, өлкөдөгү абалга байланыштуу же жетип бара албай, же бул жакта отуруп кала албай, өзүмдү коёрго жер таппай турам. Орозонун алдынан дүйнө салган досум Элмирбекти Жараткан рахматына алып, бейиштен орун берсин! Уул-кыздарына, жакындарына терең кайгыруу менен көңүл айтам. Жакшы адамдын көзү өтсө да, адамдардын жүрөгүндө жашап калат.

Жеңишбек Жумакадыр, досу:
«ЗАМАНДЫН АЙТКАН ЧЫНДЫГЫН ДОСУМ,
САНАТЫҢ ЖАШАЙТ МИҢ КЫЛЫМ, ДОСУМ»


Түшүмө чындап кирдиңби, досум?

Түгөнөр кезди билдиңби, досум?

Түйшөлтүп сени ызгаардуу дүйнө,

Түбөлүк жайды сүйдүңбү, досум?

Кучактап жыттап албайт бир белем,

Кууратар күндү ким билди, досум?

Катылган сырлар бир эле, досум,

Казына ырлар миң эле, досум.

Өнөрдүн анык тулпары элең,

Өзүңө жетчү ким эле, досум?

Өкүрүп турам өзүмө келбей,

Өкүнтүп кеттиң чын эле, досум.

Табылбайт кымбат сага кеп, досум,

Тагдырым экен, санаа көп, досум.

Суйкайган кыздар, балдарың кантем,

Сурашса «атам кана?» деп досум?

Өзгөлөр билбес кадырдын баркын,

Өзүмдү кошо ала кет, досум.

Жан дүйнө калды термелбей, досум,

Жашайбыз эми сен келбей, досум.

Эш тутуп, залкар билчү эле калкың,

Эшмамбетти көргөндөй, досум.

Токтобойт көз жаш, кабырга сыздап,

Токтогул кайра өлгөндөй, досум.

Ойлоруң тунук накта эле, досум,

Обонуң муңдуу, башка эле, досум.

Көөнөрбөс өнөр сендеги бүткөн

Көрүнүп турган кашка эле, досум.

Кылымды көрөр алтындай башың

Кырк эки гана жашта эле, досум.

Замандын айткан чындыгын, досум,

Санатың жашайт миң кылым, досум.

Жылт эткен өмүр бизде да бүтөр,

Жылмайып күтүп тургунуң, досум.

Коштогон арман кургурум, досум,

Кош эми, Элмир, булбулум, досум...

Алп акын Элмирбек Иманалиевдин «Супер-Инфо» гезитине берген маектеринен:

«АГАЛАРЫМА СҮЙҮҮ КАТТАРЫН ЖАЗЫП БЕРЧҮМҮН»

– Бир күнү атама «жер кайсы жерден бүтөт?» деген суроо узатсам, ал «жер Ленин, Сталин аталарыӊ жаткан Москвадан, Кремлден бүтөт» деп кызыктуу жооп узаткан. Атамдын жообунан кийин мага Кремлдин ары жагы деӊиз же талаа болуп барып жер бүтчүдөй туюлчу болду. Өзүм көрбөгөн нерселерди элестетип тарта баштадым. Гезит, журналдардан Лениндин сүрөтүн көчүрүп тартам. Акча, тыйындардагы сүрөтү болсо деле тарта берчүмүн. «Тартпа, көрүп калса каматып жиберет» деп коркутушса деле болчу эмесмин. Эс тарткан сайын Манаска болгон кызыгуум артып, Манастын баатырлыгына, айкөлдүгүнө, эрдиктерине маашырланып, Манас болом деп чыктым. Көк чыбыкты ат кылып минип, аны Аккула деп атап, туягын элестетип тегерете сызып атама көрсөтө берчүмүн. Бара-бара алдымдагы көк чыбык Аккула, мен Манас боло албасымды түшүнгөндөн кийин эпосту айткым келе баштады. Манас айтканымды көргөн агам «мен эпостун бардык томун окугам, сен айткан жери жок болчу» деп катуу уялткандан кийин тык токтотком. 3-4-класста окуп жатканда ыр жазуу дымагым ойгонуп, классташ кыздарга сүйүү саптарын арнай баштадым. Ыр жазганымды билген жогорку класстагы агаларым буюртма берип, сүйгөн кыздарына ыр жаздырууга өтүштү. Алгачкы гонорарларымды ошол учурда эле ала баштагам.

«МИТИНГДЕ ЫРДАГАНДАН КИЙИН АРТЫМДАН АҢДУУ БАШТАЛГАН»

– 2007-жылы ноябрь айында митингде ырдап коём деп балээге калгам. Анда эч кимди кетсин деген талап жок эле, болгону реформалык өзгөрүштөрдү күтүп эл толкуп чыккан. Ошондон кийин майда-чүйдө коркутуулар күчөп, бийликтегилердин укуругу абдан узун болот экен, ар кандай жолдор менен жолуңдан чыга берет. Ал учурда артымдан бир топ күн номери жок Жигули ээрчип жүргөн.

«КЫЗЫМДЫН ТАМАК ИЧКЕНИН, ЖӨРМӨЛӨГӨНҮН КҮНДӨЛҮК КЫЛЫП ЖАЗЧУМУН»

– Бир кезде сүйүүнүн ысыгына туруштук бере албай баш кошкон жубайлар элек, эми минтип эки тарапты беттеп кеттик. Гүлбүбү менен жашаган 15 жылдык өмүрүмдө менин көзүм ачылды, ал киши менен чогуу жашаганыма да, ажырашканыма да өкүнбөйм. Аны менен алгач таанышып, жаңы үйлөнгөн учурумду эстегенимде азыр да жүзүмдө жылмаюу пайда болот. Биз 1994-жылы таанышканбыз. Анда мен 15те, Гүлбүбү 16да болчу. Гүлбүбү Искусство институтунда окуп жүргөндө кичүү кызым Сезим 1 жашта болчу. «Окуусу үзгүлтүккө учурабасын» деп аны өзүм бактым. Ошол учур менин басып өткөн өмүрүмдөгү сөз менен айтып бере алгыс учур дегим келет. Анын тамак ичкенин, жөрмөлөгөнүн, кыскасы, баарын-баарын күндөлүк кылып кагазга түшүрчүмүн. Ошол күндөрүмдү сагынып, ошол күндөргө кетким келет.

«Казан-аяк кагышат, эрди-катын табышат» дегендей, үй-бүлөдө үйлөнгөндөн тарта анча-мынча чатактар болуп жүрдү. Бирок кайра эртеси эле табышып алчубуз. Кыргыздын башка келиндеринин башына түшкөндөй кайнене-кайнатасын багып, кир-когун жуумай дегендер Гүлбүбүнүн башына түшкөн жок. Анан ал «ырдайм» деп чыкты. Анда да колдодум. Бирок ошондо эмне максат менен ырдаганы жатканын сураган элем. Гүлбүбү көпкө ойлонуп отуруп: «Сен ырдап жүрөсүң го, мен деле сени менен тең ырдашым керек»,- деп жооп берген. Мындай жооптон кийин бизде да бир кезде үй-бүлөдө келишпестик болорун сезген элем. Эркек көбүнчө сыртта болуп, үйдүн жок-житигин толуктап турат. Ал эми аял киши бала-бакыраны багып үйдө отуруу керек. Мен барган аш-тойго Гүлбүбү да барса, экөөбүз тең түн ичинде келсек, анан уруш-талаш чыгат да. Анын үстүнө, сүйүүнүн да балалыгы, эс тарткандагысы, картайганы болот окшойт. Биздин сүйүү да картайды го деп ойлойм.

«АТАНЫН СҮРҮ БОЛОТ, ИЙМЕНИП КӨП НЕРСЕНИ АЙТА АЛБАЙМ»

Гезитибизге Элмирбек Иманалиевдин кызы Айзуура Иманалиева маек берип, атасы тууралуу буларды айтып берди эле:

– Атанын атадай сүрү болот, андан ийменип, көп нерсени айта албайм. Элмирбек Иманалиев сахнада кандай күлүп-жайнап жүрсө, жашоодо деле ошондой жөнөкөй адам. Ачуусу чукул, бирок бат жазылат. Бул сапаты мага да өткөн. Апам болсо токтоо, оңою менен ачуусу келбейт, келсе ушундай бир жарылат дейсиң. Сырымды апам менен бөлүшөм. Ага бүт баарын жашырбай айтам, эч качан кагып салып же кол шилтеп басып кетпейт. Кунт коюп угуп, жөндүү кеңеш берсе «ии, чын эле ушундай да» деп калам.

Ушул кезге чейин ата-энемдин атактуулугун пайдаланган эмесмин. Бул нерсе мага жакпайт дебейм, тескерисинче, атам менен да, апам менен да сыймыктанам. Бирок «Иманалиевдин кызы» дедирбей, баарына өз күчүм менен жетким келет.

Мен 6-классты аяктап жатканда, тилекке каршы, ата-энем ажырашып кетишти. Мындай учурда балдарга кыйын экен. «Атаң менен каласыңбы же апаң мененби?» деген суроонун өзү оор болду. Азыр баары жакшы, ал мезгил өтүп кетти. Учурда атам менен жолугушуп турабыз. Баласы Эрулан бизге өзгөчө жакын. Атам «Эрулан силерге эч бир чаң жугузбайт» деп калат. Ал эми кызы менен кичүү уулун көрө элекмин. Буюрса, келечекте жакшы катышабыз деген ойдомун. Анткени бир атанын балдары эмеспизби.

Ата-энемден ашыкча акча алгым келбейт. Айрым кыздарды көрүп жүрөбүз, ата-энесинин акчасы барбы, жокпу, болбогон нерсе үчүн сурап кыйнашат. Атамдан аябай керек болсо эле албасак, кайрылбайбыз деле. Анын үй-бүлөсү, үч баласы бар дегендей, аларды да багыш керек. Керектөөлөрүбүздүн баарын апам бүтүрөт.

«АКЫН МЕНЕН АЙТЫШСАМ ЖЕӉЕМ, КАТЫНЫМ МЕНЕН АЙТЫШСАМ ЖЕӉИЛЕМ»

Элмирбек Иманалиев экинчи никесиндеги жубайы Нурзат айым менен 3 уул, 1 кызды тарбиялап келишкен. Жубайы тууралуу бизге берген маектеринде буларды айткан эле:

– Келинчегимдин кесиби медик болгондуктан, мага кайсы тамак жакпасын, ден соолугума зыян-пайдасын карап турат.
Акын менен айтышсам жеӊем, катыным менен айтышсам жеӊилем деп калам. Анткени аялзаты назик, алсыз жан келет эмеспи. Жубайымдын аты Нурзат. Экөөбүз ооруканадан таанышканбыз. Бир учурда ден соолугума байланыштуу тез-тез ооруканага жатууга туура келди. Ал менин жеке медайымым болуп, таанышып калдык. Жылдызыбыз келишип, баш коштук. Ортобузда 3 балабыз бар. Улуубуз Эрулан 6, кызым Жайдары 5, кичүүбүз Адылхан 2 жашта (ред.: кийин дагы бир уулдуу болушкан, учурда 1 жашта).



«КӨҢҮЛҮМДӨГҮНҮ ИЗДЕП, МААНАЙЫМДЫ КӨТӨРҮҮГӨ АРАКЕТ КЫЛЫП ТУРАТ»

Элмирбек Иманалиевдин жубайы Нурзат Абдырашитова жолдошу тууралуу буларды айткан:

– Мен биринчи жолу интервью берип жатам. Өзүм сөзгө чоркокмун. Чыгармачыл инсан катары Элмирбектин бизге көп нерсеси табышмак, ошонусу менен кызыктуу. Аябай жоопкерчиликтүү. Балдарым менен чогуу аны күтүп, сыйлап турабыз. Уулубуз Эруланды абдан жакшы көрөт. Кыскасы, жакшы ата деп айта алам. Мени да эч качан капа кылбай, көӊүлүмдөгүнү издеп, маанайымды көтөрүүгө аракет кылганын көп байкайм. Татаал, оор мүнөзү да жок эмес. Аны мен эмес, көптү билген, көптү көргөн адамдар да түшүнүүсү кыйын экенин айтышат. Албетте, бул дагы анын өзгөчө бийик сапаттарынын биридир. Көп нерсеге көзү жетет. Ага «сен врач болсоӊ абдан мыкты врач болмоксуӊ» деп айтып калам.

«ЭСТРАДАНЫ ТАШТАП, АКЫНДЫКТЫ ТАНДАП ТУУРА КЫЛЫПТЫРМЫН»
«Аруузатым», «Булбулум», «Жалгыздыктан тажап бүттүм» жана башка обондуу ырлардын автору болгон алп акын чыгармачылыгы тууралуу буларга токтолгон эле:

– Обончулук, ырчылык жаатына бир кездерде катуу берилип кеткем. Чындыгында, ал кезде эстрада азгырып турган учур. Төкмөлүк талантым кадимкидей аксап калган. Азыр ойлоп көрсөм, эстрада ырчылары мага таарынышпасын, ошондо кайра акындыкты тандап эң эле туура кылыптырмын деп коём.

«Супер-Инфонун» эмгек жамааты залкар акындын мезгилсиз дүйнө салганына байланыштуу үй-бүлөсүнүн, жакындарынын аза кайгысын тең бөлүшүп, терең кайгыруу менен көңүл айтат.

Нуржамал Жийдебаева,
Динара Абдыкадырова,
Чолпон Сүйүнбаева

star@super.kg



"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.

Рейтинг: Рейтинг  -3 
Комментарийлер(10)
21.04.2020. 17:16 
Тайпасы:
Жаран
Комментарийлердин саны:
16
Катталган:
31-10-2019
Соӊку аракети:
30-04-2020 11:52
Жынысы:
Белгисиз
+7
Жайы жанаттан болсун. Окуп алып козумо жаш айланды. Кандай гана таланттуу инсан эле
21.04.2020. 19:30 
Тайпасы:
Конок
Комментарийлердин саны:
6
Катталган:
22-02-2020
Соӊку аракети:
31-05-2020 12:50
Жынысы:
Белгисиз
-1
Аттиң арман сендей алп таланттар өлбөс болуп калсачы.Жердешим,иним сен өлгөн жоксуң сен артыңда өлбөс өчпөс из калтырдың.Сенин ырларың,дастандарың,айышың өнөрдү сүйгөн кыргыз элиңдин жүрөгүндө түбөлүкө жашай берет.Жаткан жериң жайлуу,караңгы көрүң жарык болсун үй бүлөөңө бир туугандарыңа сабр берсин.Кош элдин чыгаан уулу!!!
21.04.2020. 19:30 
Тайпасы:
Конок
Комментарийлердин саны:
6
Катталган:
22-02-2020
Соӊку аракети:
31-05-2020 12:50
Жынысы:
Белгисиз
0
Аттиң арман сендей алп таланттар өлбөс болуп калсачы.Жердешим,иним сен өлгөн жоксуң сен артыңда өлбөс өчпөс из калтырдың.Сенин ырларың,дастандарың,айышың өнөрдү сүйгөн кыргыз элиңдин жүрөгүндө түбөлүкө жашай берет.Жаткан жериң жайлуу,караңгы көрүң жарык болсун үй бүлөөңө бир туугандарыңа сабр берсин.Кош элдин чыгаан уулу!!!
22.04.2020. 14:23 
Тайпасы:
Жаран
Комментарийлердин саны:
342
Катталган:
19-04-2011
Соӊку аракети:
29-05-2020 14:36
Жынысы:
Белгисиз
+3
Токтобубу Черикчиевага нааразычылыгы бар экен эле...Бир интервьюсунда «1ыр менен 5кун концерт коюп,квартира,машина алды,мен нанга тыйын чогултуп жургом»-Деп....
25.04.2020. 15:26 
Тайпасы:
Жаран
Комментарийлердин саны:
139
Катталган:
12-03-2014
Соӊку аракети:
30-05-2020 12:42
Жынысы:
Белгисиз
+5
Нурзат айым акылдуулук кылып торту тороптур, мындай залкар кишиден туяк калганы абдан жакшы, кийин атын чыгарган жакшы уул кыздардан болот, жакшы адамдан жакшы балдар торолот деп толу ишенем.
13.05.2020. 07:22 
Тайпасы:
Конок
Комментарийлердин саны:
7
Катталган:
28-04-2020
Соӊку аракети:
31-05-2020 15:55
Жынысы:
Белгисиз
0
Ошондо Эмике биринчи аялы менен канча жашында үйлөнгөн? Жана чоң кызы канча жашта?!
14.05.2020. 05:02 
Тайпасы:
Конок
Комментарийлердин саны:
3
Катталган:
15-03-2020
Соӊку аракети:
30-05-2020 16:20
Жынысы:
Белгисиз
Калаасы:
Кара Кол
0
001KG,улуу кызы 95 жылкы. Эмикенин эки небереси алты баласы калды артында.
14.05.2020. 05:13 
Тайпасы:
Конок
Комментарийлердин саны:
7
Катталган:
28-04-2020
Соӊку аракети:
31-05-2020 15:55
Жынысы:
Белгисиз
0
Elnuratoktogul, Бали Эмике, таң атпай эле үйлөнгөн экенда)). Бирок тиги үч кыз түшкөн сүрөттөгү кимиси мунун кызы?
14.05.2020. 05:25 
Тайпасы:
Конок
Комментарийлердин саны:
3
Катталган:
15-03-2020
Соӊку аракети:
30-05-2020 16:20
Жынысы:
Белгисиз
Калаасы:
Кара Кол
0
001KG,Тооба :) ортодогу аялы чекедегилери кыздары. Тарыхтан нолсунго.
Тан айтпай уйлонгону жакшы болгон экенда чиркин небере коргонгода жетишип кетти.
16.05.2020. 06:32 
Тайпасы:
Конок
Комментарийлердин саны:
7
Катталган:
28-04-2020
Соӊку аракети:
31-05-2020 15:55
Жынысы:
Белгисиз
0
Elnuratoktogul, Анын кыздарын тааныш тарыхка киреби?))))
1
Комментарий калтыруу үчүн өз ысымыңыз менен кириңиз же каттоодон өтүңүз.
 
Бөлүмдүн статистикасы
соңку 15 мүнөт ичинде 0 колдонуучу (Катталган: 0, коноктор: 0) бул макаланы окуду:

Макалалардын саны:
23946;
 
Маалымат-маанайшат порталы
2006-2020 © SUPER.KG
Кыргыз Республикасы, Бишкек шаары,
Жибек Жолу проспектиси 381
"Супер-Инфо" гезитинин материалдары жеке колдонууда гана уруксат.
Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн.
Рейтинг@Mail.ru
Биз социалдык тармактарда: