27-март күнү Нурлан Насип менен Асел Кадырбекова ата-эне статусуна ээ болушту. Ырчылардын кубанычына ортоктош болуп, бул жолу Нурлан Насип менен аталык сезимдери тууралуу маек курдук.

– Нурлан, бешик бооңор бек болсун! Кызыңар Аваз менен Айдананын үлпөт тоюнан кийинки күнү төрөлдү. Асел көбүрөөк бийлеп койсо керек, ээ?

– Рахмат, кубанычка мас болуп эле жүрөм. Тогузунчу ай болуп, өзүбүз деле “мына, бүгүн-эртең төрөйт” деп күтүп жатканбыз. Асел тойдун эртеси эле саат 11лерде “ичим” деп калды. Дароо эле төрөтканага жеткирдик. Кечки саат тогуздарда кызым төрөлдү. Мен жанында болдум. Ичине кирген жокмун, коридордо басып жүрдүм. Аселдин кыйналып жатканын угуп аябай жаман болдум. Аял кишинин ушунчалык кыйналып жатканын сезгенден кийин ого бетер баалап калат экенсиң. Бала төрөлгөндө ыйлайт го, ошону угуп алып кошо ыйлагым келип кетти (күлүп). Эгерде мындан жаш кезимде ата болсом, андай эмоциялар деле болбосо керек эле. Отузга келип калганда ата болуунун ырахатын, кадырын сезип калат экенсиң.

– Бала төрөлгөндө атасынын көкүрөгүнө жаткырышат эмеспи. Төрөлүп эле кимдин колуна түшсө ошого жакын болот деп айтышат экен, силерде кандай болду?

– Аселдин эле көкүрөгүнө жаткырышты. Бирок дарыгерлер “киндигин өзүң кессең сага окшош болот” деп киндигин мага кестиришти. Кызымдын киндигин кесип, колума алдым. Эми ал эмоцияларымды түшүндүрүп айта албайм, ар бир ата аны өз жон териси менен сезсин дейт элем. Кичине бала өзгөрө берет дешет го, бирок азыр карасам биз тарапка окшош экен. Асел “мага эч бир жери окшобойт экен” деп айтып жаткан. Кыз киши атасы жакты тартат дешет экен го.

– Дария деген өзгөчө ысымды ким тандады?

– Салт боюнча чоң ата-чоң энеси коюшу керек экен. Бул укукту биз эбак эле бергенбиз. Алар тандап берген 4-5 аттын ичинен баарыбыз ушуга токтолдук. Дария – жеңүүчү деген маанини билдирет экен. Мусулманча да жакшы маанини билдирет. Кыргызча болсо өмүрү дарыядай узун, ыйманы дарыядай таза кыз болсун деп ушул атты тандадык.

– Жакшы, Дария азыр үйгө чыгып келсе керек?

– Салт боюнча төрөгөндөн кийин “бели катысын” деп апасынын үйүндө болушу керек экен. Төрөттөн бир аз кыйналып калды, өзүнө келгенче деп кайненемдин үйүнө чыгарып барганбыз. Азыр ошол жакта, бошосом эле жандарына барам, кээде видео байланыш аркылуу кабар алып жатам. Сөзүбүз эле кызыбыз болуп калды.

– Бойдок Нурлан ата Нурланга айланганда кандай өзгөрдү?

– Мурун эле балалуу болбой эмне кылып жүрдүк деген ой келди (күлүп).

Буга чейин Асел экөөбүз болсок, эми үчүнчү жакын адам кошулду, бул биздин байланышыбызды дагы да бекемдеди. “Кичинекей үшүп калбасын, бир нерсе болуп кетпесин” деген кооптонуу болот экен. Төрөлгөндө эле анын келечегин ойлоно баштайт экенсиң. Кызыма кандай тарбия, кандай билим берүү керек, келечегин кандай куруп бериш керек деген таттуу ойлор башталат экен. Балалуу болгондон кийин жашоонун кызыктуу, таттуу экенин сезет экенсиң. Менимче, кызыктуу жашообуз эми чындап башталды окшойт (күлүп).

Ата-энемдин неберелери көп, бирок биздин кызыбыз аларга баарынан ширин болсо керек. Кайненемдин биринчи небереси, ал аябай кубанып толкунданып жүрөт. Кызыбыз боюнда болгондо Асел да өзгөрдү. Мурункудан да жумшак, боорукер, мээримдүү болуп калды.

– Адатта түгөйлөрдүн сүйүүсү балага өтүп кетет дешет...

– Асел экөөбүз сүйүшүп баш коштук да, эч кайда өтүп кетпейт, өзгөрбөйт деп ойлойм. Балага болгон сүйүү башка, ата-энеге болгон сүйүү башка, аялга болгон сүйүү башка да. Бирине-бирин жолтоо кылбай сүйсө болот. Баланы мага төрөп берип, багып жаткан келинчегимди ого бетер баалап сыйлап калам го деп ойлойм.

– Үй-бүлөдө баары жакшы окшойт, чыгармачылык аксап жаткандай сезилбейби?

– Иштеп жатабыз, ырлар жазылып, клиптер тартылып жатат, Асел кош бойлуу болуп гастролго барбай калды, өзүм гастролдоп келдим. Үй-бүлө кургандан кийин бир аз алаксуу болушу мүмкүн. Эми кичинекейди аман-эсен чоңойтуп алсак, билекти түрүп чыгармачылыкка киришебиз деп турабыз.

– Ырчылар үйлөнгөндөн кийин күйөрмандарын жоготуп алуу коркунучу бар эмеспи. Мисалы, казак ырчысы Кайрат Нуртас төрт балалуу болгончо үй-бүлөсүн жашырып келбедиби? Сенде бул тууралуу кооптонуу болду беле?

– Күйөрмандар өзүмчүл келишет. Жакшы көргөн ырчысын менчиктеп алат. Өзүбүзгө келсек, Асел экөөбүздө тең күйөрмандарды жоготуп алуу коркунучу бар болчу. Бирок бул үчүн баш кошпой коймок белек. Тескерисинче, биздин күйөрмандарыбыз биригип кетти окшойт.

– Экөөңөр тең эл көзүндөгү адамсыңар да, үй-бүлөдөгү бардык нерсени эл менен бөлүшүүгө туура келгени сени ыңгайсыз кылабы же жагабы?

– Мурун бул тууралуу ойлончу деле эмесмин, турмуш кургандан кийин көп нерсени элге алып чыкпоо керек деп абайлап калдым. Анткени элдин көзү-сөзү деген бар. Көп учурда үй-бүлө тууралуу интервью бергенден да сактанып калдым. Бир чети азыр замандын талабы болуп калбадыбы, замандын агымынан чыгып кайда бармак элек.

– Сөз соңунда кызыңа тилектериңди айтып алсаң болот...

– Кызым, сени биринчи колума алганда “бул жарыкка кош келдиң” деп айттым. Сенин жашооңдо таттуу күндөрүң көп болсо экен деп тиледим. Ыймандуу, билимдүү кыз болсоң экен. Апаңдын назиктигин, сулуулугун алсаң, менден эмгекчилдигимди алсаң жакшы болсо керек. Эң негизгиси сага жакшы тарбия, сүйүү бергенге аракет кылабыз.

– Маегиңе рахмат. Кызыңардын келечеги кең болсун!

Нуржамал Жийдебаева
star@super.kg